КАНОН Ангелу Грозному, и воеводе, и хранителю всех человек, от Бога посланному по вся душа человеческая[5] Ты же, человече, не забывай часа смертного: пой по вся дни канун сей творение Уродиваго Парфения. По утреннем пении глаголи: Молитвами святых отец наших, Господи Иисусе Христе, Сыне Божий, помилуй нас. Аминь Царю Небесный, Утешителю, Душе истины, Иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша. Святый Боже, Святый Крепкий, Святый Безсмертный, помилуй нас. (Трижды.) Слава Отцу и Сыну и Святому Духу, и ныне и присно и во веки веков. Аминь. Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради. Господи, помилуй. (Трижды.) Слава, и ныне. Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго. Господи, помилуй. (12 раз.) Слава, и ныне. Приидите, поклонимся Цареви нашему Богу. Приидите, поклонимся и припадем Христу, Цареви нашему Богу. Приидите, поклонимся и припадем Самому Христу, Цареви и Богу нашему. Помилуй мя, Боже, по велицей милости Твоей, и по множеству щедрот Твоих очисти беззаконие мое. Наипаче омый мя от беззакония моего, и от греха моего очисти мя; яко беззаконие мое аз знаю, и грех мой предо мною есть выну. Тебе единому согреших и лукавое пред Тобою сотворих; яко да оправдишися во словесех Твоих, и победиши внегда судити Ти. Се бо, в беззакониих зачат есмь, и во гресех роди мя мати моя. Се бо, истину возлюбил еси; безвестная и тайная премудрости Твоея явил ми еси. Окропиши мя vссопом, и очищуся; омыеши мя, и паче снега убелюся. Слуху моему даси радость и веселие; возрадуются кости смиренныя. Отврати лице Твое от грех моих и вся беззакония моя очисти. Сердце чисто созижди во мне, Боже, и дух прав обнови во утробе моей. Не отвержи мене от лица Твоего и Духа Твоего Святаго не отыми от мене. Воздаждь ми радость спасения Твоего и Духом Владычним утверди мя. Научу беззаконныя путем Твоим, и нечестивии к Тебе обратятся. Избави мя от кровей, Боже, Боже спасения моего; возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо: всесожжения не благоволиши. Жертва Богу дух сокрушен; сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимския. Тогда благоволиши жертвы правды, возношение и всесожигаемая; тогда возложат на олтарь Твой тельцы. Канон, глас 6-й Песнь 1 Ирмос: Яко по суху пешешествовав Израиль, по бездне стопами, гонителя фараона видя потопляема, Богу победную песнь поим, вопияше. Припев: Святый Ангеле, грозный воевода, моли Бога о нас. Прежде страшнаго и грознаго твоего, Ангеле, пришествия умоли о мне грешнем о рабе твоем имрек. Возвести ми конец мой, да покаюся дел своих злых, да отрину от себе бремя греховное. Далече ми с тобою путешествати. Страшный и грозный Ангеле, не устраши мене маломощнаго. Дай ми, Ангеле, смиренное свое пришествие и красное хождение, и велми ся тебе возрадую. Напой мя, Ангеле, чашею спасения. Слава: Святый Ангеле, да мя напоиши чашею спасения и весело теку во след твоему хождению и молюся - не остави мене сира. И ныне: Рождьшия Ти Царя вышним силам, Пресвятая Царица, Ты бо еси милостива, можеши бо облехчити мое бремя греховное тяшкое. Песнь 3 Ирмос: Несть свят, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего. Припев: Святый Ангеле, грозный воевода, моли Бога о нас. Святый Ангеле Христов, грозный воевода, помилуй мя грешнаго раба своего имрек. Егда приидет время твоего прихода, святый Ангеле, по мене грешнаго имрек разлучити мою душу от убогаго ми телеси, - вниди с тихостию, да с радостию усрящу тя честно. Припев: Святый Ангеле, грозный воевода, моли Бога о нас. Молю ти ся, святый Ангеле, яви ми свой светлый зрак и весело возри на мя окаяннаго, да не устрашит мене приход твой святый, да уготоваюся на сретение тебе честно. Слава: Святый Ангеле, посланиче Божий, дажь ми, Ангеле, час покаятися согрешении и отринути от себе бремя тяшкое. Далече ми тещи во след тебе. И ныне: Святый Ангеле, не имам иного разве тебе заступника скора. Помилуй грешнаго раба своего имрек и приведи душу мою ко Владычицы. Та бо есть милостива отпущати грешным согрешения. Песнь 4 Ирмос: Христос моя сила, Бог и Господь, честная Церковь боголепно поет, взывающи от смысла чиста, о Господе празднующи. Припев: Святый Ангеле, грозный воевода, моли Бога о нас. Молю ти ся, страшный и грозный Посланниче Вышняго Царя, воевода, - весело возриши на мя окаяннаго, да не ужаснуся твоего зрака и весело с тобою путешествую. Припев: Святый Ангеле, грозный воевода, моли Бога о нас. Пл[а]чася и вопию, Воевода Небесного Царя. Грозно вохожденние твое, да не вскоре разтлише[6] мене грешнаго, но весело и тихо напой мене смертною чашею. Слава: От сердца вопию ти, грозный Воевода и воине Царя царствующим, несть силнее тебя и крепчайши во брани, и умиленна в смерти[7], и пряма во исправлении. Исправи душу мою на путь вечен. И ныне: Госпоже, Богородице, Дево, рожшия Царя Небеснаго, смертоноснаго часа не минухся, избави душу раба Своего имрек от сети ловящих. Песнь 5 Ирмос: Божиим светом Твоим, Блаже, утренюющих Ти души любовию озари, молюся, Тя ведети, Слове Божий, истиннаго Бога, от мрака греховнаго взывающа. Припев: Святый Ангеле, грозный воевода, моли Бога о нас. О сродници мои, егда видите мене от вас разлучена, и зрак лица моего изменихся, и гробу предаюся, и ко Судии влеком буду, - и молитеся о мне святому Ангелу, да ведет душу мою в место покойно. Припев: Святый Ангеле, грозный воевода, моли Бога о нас. О друзи мои любезнии, егда видите мене от вас разлученна и земли предаема, - помолитеся о мне грешнем ко святому Ангелу, да проводит душу мою вся двадесят мытарств и измет от всех погибелей. Слава: Людие Божии, благочестнии и вся племена земьстии, егда видите смертоное[8] тело на земли повержено и вонею объято - помолитеся ко Ангелу смертоносному о мне, да ведет душу мою в тихое пристанище. И ныне: Пресвятая Дево Богородице, Владычице, Ты веси немощь земных человек. Вскоре разоряетца естество плоти нашей. Ты, Госпоже, буди нам Заступница. Песнь 6 Ирмос: Житейское море, воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве. Припев: Святый Ангеле, грозный воевода, моли Бога о нас. От Бога посланнаго страшнаго Воина, царем, и князем, и архиереем, и всем людем великое изменение от суетнаго века сего, в напастех пребывающих и в скорбех тружающих сущи верных. Припев: Святый Ангеле, грозный воевода, моли Бога о нас. Святый Ангеле, от всех нас на земли живущих дань свою приимеши от Бога повеленную ти, егда приидеши и неси в сокровище света. Слава: Святый Ангеле, грозный Посланниче, и мене избави от суетнаго жилища сего. И ныне: О Царице Владычице, сирым Питателница и обидимым Заступнице и бедным Помощница, болным Надеяние и всем грешным оцыщение, и мне грешному имрек буди ми Помощница и помилуй мя. Кондак, глас 5-й Небеснаго Царя воевода и предстатель Престолу Божию и творитель воли Господни и совершитель заповедей Его, не лишиши ся славы велелепныя и прославишися, скоро пленяеши и не замедлиши николи же. Всюду готов стоиши, и храбруеши, и зла не убоишися, ни стара отриеши, ни млада отступиши. Вся имеши и ведеши в место покойно. И мене помилуй грешнаго и окаяннаго имрек, да поем ти: Аллилуиа. Песнь 7 Ирмос: Росодательну убо пещь содела Ангел преподобным отроком, халдеи же опаляющее веление Божие, мучителя увеща вопити: благословен еси, Боже отец наших. Припев: Святый Ангеле, грозный воевода, моли Бога о нас. Великий, мудрый хитрец, никто не может твоея хитрости разумети, дабы скрылся от твоея нещадности. Святый Ангеле, умилися о мне грешнем и окаяннем. Припев: Святый Ангеле, грозный воевода, моли Бога о нас. Мудрый Ангеле и светлый, просвети ми мрачную мою душу своим светлым пришествием, да во свете теку во след тебе. Слава: Святый Ангеле, радуюся душою и трепещу рукою и показуя людем час разлучения души моей грешней от убогаго ми телеси. Святый Аньгеле, помолися о мне грешнем. И ныне: Пресвятая Богородице, Владычице, помилуй грешнаго в час разлучения. Святый Ангеле, страшный Посланниче, изми душу мою от сети ловящих. Песнь 8 Ирмос: Из пламене преподобным росу источил еси и праведнаго жертву водою попалил еси: вся бо твориши, Христе, токмо еже хотети. Тя превозносим во вся веки. Припев: Святый Ангеле, грозный воевода, моли Бога о нас. Царю Небесному, слава Нетленному и непроходимая сотворшему чины ангелския, такова страшна и грозна смертоносна Ангела. Хвалите, пойте и превозносите его во веки. Припев: Святый Ангеле, грозный воевода, моли Бога о нас. Царя Небеснаго слуга и предстатель Престолу Божию, святый Ангеле, смерть принося нам измени нас добротою здания твоего и приведи нас к свету Светлейшему Судии. Хвалите, пойте и превозносите его во веки. Слава, и ныне: Царю Небесному, Богу нашему угождаеши, славы не отпадаеши, и заповеди Его не преступаеши, и волю Его твориши, и в любви пребываеши. Ангела тя свята хвалим, поем и превозносим его во веки. Песнь 9 Ирмос: Бога человеком невозможно видети, на Негоже не смеют чини Ангельстии взирати; Тобою же, Всечистая, явися человеком Слово Воплощенно, Егоже величающе, с небесными вои Тя ублажаем. Припев: Святый Ангеле, грозный воевода, моли Бога о нас. Осквернивше душу злыми похотми и теплыми слезами не омывше и милостынею не очистивше, страшнаго Посланника не поминающе, мы же тя, Ангеле, по достоянию величаем. Припев: Святый Ангеле, грозный воевода, моли Бога о нас. Бога нам поведаеши, святый Ангеле, и душу мою окаянную ис тела изимаеши, и плоть разтлиши и гробу предаеши, молим ти ся, святый Ангеле, изми душу мою от сети ловящих, тя величаем. Слава: От Бога посланному, всех ангел престрашен еси, святый Ангеле, не устраши мою душу убогую, наполнену злосмрадия, и очисти, и престави ю Престолу Божию непорочну. Тя величаем. И ныне: О Богоматерь Пречистая, вся спасаеши и милуеши, такожде помилуй мене грешнаго и злосмраднаго в час разлучения и в муку посланному. Тогда же ми помози, и огня изхити мя и от муки избави мя. Тя величаем. Достойно есть яко воистину блажити Тя Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем. Святый Боже, Святый Крепкий, Святый Безсмертный, помилуй нас. (Трижды.) Слава, и ныне. Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради. Господи, помилуй. (Трижды.) Слава, и ныне. Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго. Тропарь, глас 5-й Небесных сил избраннаго воеводу, от Бога посланнаго мудраго оружника и грознаго полченина и победителя вражиимь силам, святаго ангела, поюще, хвалим. Смертию нас назирает, и от суеты мiра избавляет, и на суд праведни ко Христу представляет, и от вечных мук избавляет [ны да поем ему: Аллилуиа]. Слава, и ныне. Упование наше, Богородице, крепкая Помошнице скорбящим, и от смерти изимаеши и от муки избавляеши, комуждо по достоянию благодати даеши [Тя величаемь]. Та же, и отпуст. Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем. Слава, и ныне. Господи, помилуй. (Трижды.) Господи, благослови. Конец всем благим. Слава свершителю Богу. Аминь.
|